Það má með sanni segja að barnasýningin ,,Magic Show” með hinum sívinsæla Lalla töframanni sé alveg einstakt sviðsverk hér á Íslandi. Lagt var upp með að nota undraheim töfra og töfrabragða til að skapa hrífandi barnaverk í lengd sem hentar yngri leikhúsgestum, nær til þeirra og tengir þau saman alls óháð tungumáli. Fremur en að skapa verk í orðum sem þýða má fyrir mismunandi menningarheima og bakgrunna vill Lalli töframaður skapa sameiginlega  upplifun meðal gesta sinna sama hvaða tungu þau tala. 

Miðaverði er haldið eins lágu og kostur er til að bæta enn aðgengið fyrir gesti af ólíkum uppruna. Sýningin hentar svo sannarlega allri fjölskyldunni og með lægra miðaverði en gengur og gerist vill Lalli auðvelda barnafólki að hópast í leikhúsið og sparka duglega í verðbólgudrauginn á leiðinni.

Að lokum má nefna aðgengi að- og inn í Tjarnarbíói sem er mjög gott fyrir þau sem notast við hjólastól eða önnur hjálpartæki við hreyfingu og notist leikhúsgestur við NPA þarf ekki að greiða fyrir miða aðstoðarmanneskjunnar.

Það má því sannarlega velta því fyrir sér hvort Lalli töframaður hafi hér búið til aðgengilegustu barnasýningu Íslandssögunnar og þótt víðar væri leitað.